سنا ہے لوگ اُسے آنکھ بھر کر دیکھتے ہیں

سو اُس کے شہر میں کچھ دن ٹھہر کے دیکھتے ہیں

سنا ہے ربط ہے اُسے خراب خالوں سے

سو اپنے آپ کو برباد کر کے دیکھتے ہیں

سنا ہے درد کی گاہک ہے چشم ناز اُس کی

سو ہم اس کے گلی سے گزر کے دیکھتے ہیں

سنا ہے اُس کو بھی ہے شعروشاعری سے شغف

سو ہم بھی معجزے اپنے ہنر کے دیکھتے ہیں

سنا ہے بولے تو باتوں سے پھول جھڑتے ہیں

یہ بات ہے تو چلو بات کرکے دیکھتے ہیں

سنا ہے رات اُسے چاند تکتا رہتا ہے

ستارے بام فلک سے اُتر کر دیکھتے ہیں

سنا ہے دن کو اُسےتتلیاں ستاتی ہیں

سنا ہے رات کو جگنو ٹھہر کے دیکھتے ہیں

سنا ہے رات سے بڑھ کر ہیں کاکلیں اس کی

سنا ہے شام کو سائے گزر کے دیکھتے ہیں

سنا ہے اُس کی سیاہ چشمگی قیامت ہے

سو اُس کو سُرمہ فروش آہ بھر کے دیکھتے ہیں

سنا ہے اس کے لبوں سے گلاب جلتا ہے

سو ہم بہار پہ الزام دھر کے دیکھتے ہیں

سنا ہے آئینہ تمثال ہے جبیں اُس کی

جو سادہ دل ہیں اُسے بن سنور کے دیکھتے ہیں

سنا ہے جب سے حمائل ہیں اس کی گردن میں

مزاج اور ہی لال و گوہر کے دیکھتے ہیں

سنا سے چشمے تصور سے دشت امکاں میں

پلنگ زاویے اُس کی کمر کے دیکھتے ہیں ہیں

سنا ہے اس کے بدن کی تراش ایسی ہے

کہ پھول اپنی قبائیں کتر کر دیکھتے ہیں

وہ سروقد ہے مگربے گُل مراد نہیں

کی اُس شجر پہ شگُوفے ثمر کے دیکھتےہیں

بس اک نگاہ سے لٹتا ہے قافلہ دل کا

مکیں اُدھر کے بھی جلوے ادھر کے دیکھتے ہیں

رُکے تو گردشیں اُسکا طواف کرتی ہیں

چلے تو اُس کو زمانے ٹھہر کے دیکھتے ہیں

کسے نصیب کی بے پیراہن اُسے دیکھے

کبھی کبھی درودیوار گھر کے دیکھتے ہیں

کہانیاں ہی سہی، سب مبالغے ہی سہی

اگر وہ خواب ہے تو تعبیر کرکے دیکھتے ہیں

اب اُس کے شہر میں ٹھہریں کے کوچ کر جائیں

فرازؔ آو ستارے سفر کے دیکھتے ہیں